Vreni - Schnogys

Mi Name isch Hügi Vreni. Wie ig zum Schnöregiigele cho bi? Eines Tages isch mi Maa Hei cho und het gseit: «I gloube, i lehre Schnöregiigele!» Aber e Tag spöter het dr Ueli gmeint: «Das isch nüt für mi. Gang du. Das isch jo mit Note!»

Mi Grosätti het üs scho glehrt tanze, i einere Hand d’Schnöregiige und üs het är undere Arm gno. Die unvergässlechi Erinnerig het mi natürlech inspiriert zum probiere. Ou ig ha d’Note nid kennt.

Dodruf bi ig zum Sämi Kurt, denn er het Schüeler gsuecht für d’Schnöre-giigelischuel Willi Schwager. Bim Sämi im Gartehüsli han ig de jede Mittwuch mit es paar Schnöregiige-Kamerade dörfe go üebe. Ou d’Gmüetlechkeit isch do nid z’churz cho.
Später si de immer meh Kamerade zu üs gschtosse, bis das Gartehüsli z’chli isch worde. Mir hei üs de uf d’Suechi gmacht für nes Üebigslokau z’finde. Im Tierlihuus z’Aarwange hei mir de jede Mittwoch chönne witer üebe.

Mir hei de ou Spass übercho a verschidene Uftritte und so bi ig scho 8 Johr bi de Aarwanger Schnöregiigeler derbi.
Es macht mir immer no vöu Spass und ig hoffe, dass ig no rächt lang cha mitspiele.




zurück